記得? 記不得!

人真係一樣好奇怪的動物. 我永遠都唔記得我個病人叫咩名, order藥時又唔記得要落幾多, 就連我幾時當夜, 返邊更,我都可以唔記得,

但係, 我腦海經常想起我小時侯的事. 我記得我小學留堂後返屋企的情景, 我記得我細個同我細路一齊玩的每一幕, 我記得我好鍾意睇tvb既drama, 成日做功課時同細路一齊偷睇. 我記得我細過每日放學, 都去婆婆洗碗既餐廳, 食豬扒飯做晚餐. 我記得我中一啦啦隊跳"陽光"時的每一步. 我記得我玩orchestra的日子, 一齊去廣州表演. 我記得我佈置學校十五週年時的每一晚. 我記得由中四開始, 我每一日行友愛返屋企, 我就幻想(呃..應該是妄想)我將來做左醫生, 有錢買車, 再好"風光"返陳記探老師. 我記得謝師宴0個晚我地既播"從今開始"玩黃sir! 我記得的那港姐同學, 那一晚著了一條白色長裙晚禮服.

可是, 中五之後的事, 我就開始不太記得了.

只記得, 我同班friend玩girl's talk, 玩通宵. 可是, 之後呢?

之後, 我的生命只有讀書, 返工, 讀書, 和返工.

唔記得, 係因為我對生命沒有了小時候的熱誠, 還是我對所有事已經"習以為常"?

不過我的理智同我講, 我極有可能係只是老人痴呆!